“जो वाचेल, तोच घडेल!” पुस्तक वाचनातूनच भारत विश्वगुरू बनेल – वाल्मीक सरतापेमुंढवा येथील लोणकर माध्यमिक विद्यालयात वाचक दिन उत्साहात साजरा
मुंढवा, पुणे | प्रतिनिधी सुधीर तायडे
विद्यार्थ्यांमध्ये वाचनाची आवड निर्माण व्हावी, ज्ञानाची व्याप्ती वाढावी आणि त्यांच्यामध्ये वैचारिक प्रगल्भता विकसित व्हावी, या उद्देशाने गुरुवार, दिनांक १५ ऑक्टोबर २०२६ रोजी कोंढवा येथील लोणकर माध्यमिक विद्यालयात वाचक दिन उत्साहात साजरा करण्यात आला. या कार्यक्रमाला वडगाव शेरी, पुणे येथील सामाजिक कार्यकर्ते, लेखक व कवी श्री. वाल्मीक सरतापे प्रमुख पाहुणे म्हणून उपस्थित होते.या कार्यक्रमाचे आयोजन विद्यालयाचे प्राचार्य श्री. अंकुश कामठे यांनी केले होते. कार्यक्रमाच्या यशस्वितेसाठी पर्यवेक्षिका सौ. कविता आंबवले, आदर्श ग्रंथपाल पुरस्कारप्राप्त श्री. तानाजी कांबळे, श्री. संतोष शितोळे आणि सौ. सुरेखा शितोळे यांनी सहकार्य केले. यावेळी शिक्षकांनीही सक्रिय सहभाग नोंदविला. विद्यार्थ्यांनी संपूर्ण कार्यक्रम अत्यंत उत्सुकतेने आणि मंत्रमुग्ध होऊन ऐकला.प्रमुख पाहुणे श्री. वाल्मीक सरतापे यांनी आपल्या मार्गदर्शनपर भाषणातून विद्यार्थ्यांना वाचनाचे महत्त्व पटवून दिले. “जो वाचेल, तोच घडेल,” या विचाराचा संदर्भ देत त्यांनी सांगितले की, नियमित पुस्तक वाचनामुळे ज्ञानात भर पडते, विचारांना योग्य दिशा मिळते आणि व्यक्तिमत्त्वाचा सर्वांगीण विकास होतो. आजच्या विद्यार्थ्यांनी वाचनाची सवय अंगीकारली, तर ते उद्याचे सुजाण, बुद्धिमान आणि जबाबदार नागरिक बनतील. ज्ञान, विज्ञान आणि विचारांच्या बळावरच भारताला विश्वगुरू बनविण्याचे स्वप्न साकार होऊ शकते, असेही त्यांनी यावेळी नमूद केले.कार्यक्रमादरम्यान विद्यालयातील शिक्षकांनीही वाचन संस्कृतीचे महत्त्व अधोरेखित केले. मोबाईल आणि डिजिटल माध्यमांच्या वाढत्या वापराच्या काळात विद्यार्थ्यांनी पुस्तकांशी मैत्री करणे, नियमित वाचन करणे आणि वाचलेल्या साहित्याचे चिंतन करणे आवश्यक असल्याचा संदेश या कार्यक्रमातून देण्यात आला.कार्यक्रमाचे सूत्रसंचालन सौ. सुरेखा शितोळे यांनी केले, तर श्री. रमेश शितोळे यांनी समारोपाचे भाषण करून उपस्थित मान्यवर, शिक्षक आणि विद्यार्थ्यांचे आभार मानले.वाचनातून ज्ञान, ज्ञानातून प्रगती आणि प्रगतीतून राष्ट्रनिर्मिती, हा संदेश देत लोणकर माध्यमिक विद्यालयातील वाचक दिनाचा कार्यक्रम उत्साहपूर्ण वातावरणात संपन्न झाला.